
Nidang lai-inah..., Sen gamah Lily a kici numeino khat aom hi. Lily pen pasal aneih tak ciangin apasal nungzui-in a teekte kiangah om hi. Asawt loin Lily pen ateeknu tawh hong kilemlo aa ngeina hetzia tatziate kibatlohnate hangin ateeknu in phunsan den hi.
Hih bang teng tawh ni hong tum zelin kaal khat bang hong phata hi. Ateeknu tawh hong kilemlo tetek tak ciangin Lily zong khat peuhpeuh sep khiat ding hong vaihawm ta hi. Ateekte ii simmawh bawlsiatna hangin zong Lily maimial den lungsim gimden ahih manin a nuntakna kuacik sa mahmah hi. A lawmpa lah ngai mahmah aa a zuih hizel mawk ahih ciangin taisan ngamlo hi. (Numeite ii dinmun a hehpihhuai khat ah taisan ding kikhen ding a hamsa hilo aa, kimm le paamte ii zahkonate thuak ding uh hi.)
Atawpna ah Lily in thuakzo nawnlo ahih manin apa ii lawm zatui bawlsiam Mr.Huang kiang va pai-in huhna va ngen hi. A thuakna gentheihna thu piang teng genin 'vuza' pawlkhat hong lei sak in ci'n va ngen hi. Mr.Huang in tawmvei sung ngaihsun deedaa photin atawp khakna ah "Lily aw... na hamsatna teng keimah'n hong huh ning in! ahi ta zongin kei kong gen thute na zui ding aa ka cih bangbangin na gamta ding hi" a ci hi.
Lily in zong Mr.Huang ii gen bangbangin gamta mah ning a ci hi. Mr.Huang zong inn nung lamah va pai aa zatui aa kimang ding singteh pawlkhat hong keng hi. Mr.Huang in a genna ah; "Na teeknu thah nading pen tu le tu in vuza tawh ki that thei nailo hi. Bang hang hiam cih leh nang tawh na lem loh lam na veng na paam te'n hong thei uh ahih manin nang mah hong ki ummawh ding hi. Tuaih manin ama' pumpi sungah damdamin hong zawm ding aa tu zawh kha nga kha guk ciang a sih theih nading zatui kong pia ding hi. Hih sung tengin limh takin na kem inla, na it bawl in. Tua hileh a sih ciangin nang hong ki muangmawh nawnlo ding hi, a cih ciangin Lily zong thukim pahin a innah a ciah kik hi.
Tua zawh aa kipan anlim nono tui lim nono na pia inla, hih kong piak zatui na khah sak den in a ci hi. Ahi zongin na teeknu pen kidawm takin hopih in. Na pianna na nu mah bangin bawlin la, it bawl in. Lily zong Mr.Haung ii vaikhak na tawh kizui-in a teeknu anlim nono tawh vakin ni dang tawh a kibang loin hopihin pi bawl dakdak hi. Lungsim ki muangmawh nading aom loh theihtheih nadingin zong aw khum nono tawh hopih hi. Kha 6 bang hong sawt tak ciangin a innkuan sunguh hong kikhel gai aa, Lily zong ama ii gamtat phatna teng zongsangh in amah le amah zong mi lungsim hoih ahih lam hong kithei ta hi.
A teeknu tungah lungsim hoihlo thangpaihna teng hong beita hi. Banghang hiam cihleh a teeknu tung aa a thusiamna a pi bawlnate pen hamsalo khatin hong ngaihsun ta hi. A teeknu in zong Lily pen a sung aa piang tanu khat bangin hong it thei aa, a veng a paam a lawm a gualte kiangah zong Lily pen cik mah aa a kingah zo nawnlo ding mohoih numei ahih lam khawng gen kawikawi hi. Hih bang teng tawh hun hong bei totoin khat le khat innkuan sung ki-itna hong picing to semsem hi.
Nikhat Lily in Mr.Huang kiangah huhna khat va ngen dingin va paikik hi. Amah in Mr.Huang aw... ka teeknu vuza nong piak sak vai tawh kisai nong huh nang kong thumm hi. Amah tun teek numei hoih mahmah khat hong hita hi. Ken zong ka pianna ka nu khat zah mahin ka ngai takpi hi. A annek lak aa ka khah sak zatui "vuza" tawh a sih loh nang kong ngen hi... acih leh Mr.Huang pen nui hiuhiau kawmin; "bangmah lungkham ding hi peuhmah kei ei Lily aw... kong piak zatui in vuza hi peuhmah lo aa, ama ading Vitamin aom theih na'ng an kam limza leh tha omza ahi hi. A taktakin cileng nang ma' ii lungsim sungah na teeknu na huatna na muhdah etsakna vu na lungsim sungah aom hi zaw hi. Ahi zongin na itna lahna na phatna bawlnate in a vekpin tua vu teng beimang sak khinta hi.
#####################################
Sen te'n paunak khat nei uh hi :) { Midang khat a it a ngaite in midang khat ii it le ngaihna a ngah uh hi.} Na khempeuh a beimang khin zah dongin na itna hangin a tawpna ah na khat teitei cianlai buang ding hi.
Tua inah;
"Khuaimei vak khat in a dang khuaimei vak khat meitaang a piak hangin amah mit tuam tuanlo hi."
No comments:
Post a Comment
Lai mal khat nong nusiat na-in, lai mal tampi at di tha kingah hi.