914 ( Zomi ) Census vai tawh kei ngaihsutna

Ih minam min di-in "Zomi" cih tawh kisai kei zong ka ngaihsutna tawm kong kuppih nuam hi. Ih khua ah minam thum bangin 'Vote' kipia cih ka zak ciangin ka lungnuam hetlo aa, ka himawh mahmah hi. Hih thu kon gen ma-in i pu i pate ii pianzia tawm khat lunggel kik leng ka ut hi.
         Kei mahmah aa kipan Zomi tampi te in; tang aa tuan aa i pu i pate pen Dawi bia/ Kau bia peuh sakha mawk hi hang. kei zong hih thu ka na kankan tak ciangin i pu i pate dinmun i bat nai vitloh lam ka kiphawk sann aa hai ka kisa mahmah hi. I pu i pa ten Dawi na bia dek khia suailo aa Pasian mah na paai uh hi. Dawi ciangin na thoih uh hi. Thoih cih ciang palik upa hausa khat ahi zongin i lau manin a kithoih ahi hi. Kau ciangin na hawlkha uh hi. © Pasian paai, Dawi thoih, Kau hawlkha ® ci-in na khen dimdiam hi. Topa Jesu a thei nailo a saang nailo bek hi uh aa, Pasian pen na bia veve uh hi. Leitung ah Zomi te i om zawh kum bangzah pha khinta i hiam..? Ngaihsut kik huai sa ing. Banghangin tu phingphingin Zomi ka hi uh hi, cih leitungah tangko panpan di i hiam? Leitung zong ci naikei ni; kawlgam sung na ngawnah banghangin Zomi om hi cih ciaptehna ngah nailo liangh i hi hiam..? 

         914 ~ Zomi ci-in gamdang panin na ciak au-au hangin tu zawh kum 10 tak ciang na tu na ta in, "I am Zomi" "Zomi kahi hi." a ci ngam uh diam?..?? Zomi hi hang i cih leh Zopau, Zongeina, Zola, Zolai i theih kul hi. I pu i pa te mihai Dawi bia peuh aa sim mawh bawl in i Pu/pa ngeina te i let kip loh ziakin tuni ciang dong kuamah in Zomi ci-in ong pi bawllo ahi hi. Laphuak khat bang in "Mimbang pianna tuan pupa ten sin lailung a mawl manin maw... ci'n 'Zo laukha' zaila sungah phuak zen hi. Tu hun ciang Christian khangthak/ pianthak ci'n banghangin i pu i pate mihai aa mu mawkmawk i hiam? Pawlpi tuamtuam kiphuan aa, pawl kibang kei leng a kiho thei nawnlo di, a kingai thei nawnlo di, a kitenng thei nawnlo di sa mawk hi hang. Ki langpan pah hi hang. Pasian thu i up aa i zuih leh ki-it kilem di leh ki pumkhat di vive Pasian in deih hilo ahiam?

        Khanglui lai in sungh le pu kimatna nam (12) ki nei hi. Tual a khaii ciangin Tual thukhun nam (10) om hi. Hihte Pasian thu tawh a ki zawitawnlo khat zong omlo hi. Hih teng i mangngilh zial leh i langbawl ziakin i minam a mangthang ta hi. "Pupa pianzil khuambang gualin, khanggui khaubang sut ve ni aw.." 

        Minam cih ciangin mi tawh a kibanglo te minam kici hi. Tuh mah bangin minam cih ciang pau le ham ngeina mi tawh a kibangte kici hi. Gentehna'n:   : Sente ei Zomi tawh kibanglo hi hang, ngo uh hi. Negro te ei Zomi te tawh kibanglo hi hang vom pha diak hi. Mel le sa bek ki lamdang loin hekzia, tatzia, kampau zia, ngeina, ki-itzia, kihumzia kibanglo hi. Kibanglo mah tase leh hi te pen leitung i heksuk i hektohna ah i muh ciang bang ci i hiam.. a puan silh uh i muh aw..hih te bang mi kua mi cih gen thei hi hang. Cih nopna ah amau a ngeina te uh kemcingin a tuntun na vuah a minam nite a paute a laite uh mi dangte theih di'n zangh khia lak khia uh hi. Malaysia gam Sen te aa' hilo hi. Zangkong Sen te aa hilo hi. Ahiang banghang Sen te ci'n Malay kumpi/ Kawl kumpi tiaptehna pia hiam?...? A paipai na uh a tuntun na uhah a ngeina te uh a ken a vom ziak uh ahi hi.....

        Zomi sungah kamphen kullo aa, i pau i kitel nakleh minam khat bawnng khat zung khat phung khat i hi pah hi. Teizaang, Saizaang, Dim, Tedim, Hualngo, Sihzaang, Phaileeng, Losau, Vaiphei, Khuano, Guite.... cihte pau in ong kipau leh kitel hi. Hih te pen ih aw suah i pau ahi aa, minam ahi kei hi.. Ahi zongin hih te khempeuh tawh ei minam khat ihi pah hi. Hakha pau Mindat pau in ong ki pau ciang na tel hiam? Tuaih leh minam khat hi hang i ci thei diam?

        Zomi hi'ng cih i lah theih nadi'n: Zopau na thei hiam? ( Mi lakah zopau tawh na kiho ngam hiam? ) Zopuan na nei hiam? ( Mi lakah na silh ngam hiam? ) Zola na sa thei hiam? ( Mi lakah ka lapi uh ci'n na awi ngam diam? )

       Zomi hi hang i cih leh i minam ngeina te pau le ham i zaila te Tual thukhun te zui kik ni. A thu a la kantel phot lo pi-in awng pangpang gawp pahpah kei ni. "Zomi ka hi hi" i cihcih aa la i phuak lai i at  thu i gengen hangin kumpi leh UN te in official record na ong nei nailo ahih manin i minam a kilat na di i khangsawn dong a kimang di leh leitung bei dong a kimang di ahih manin i khuazaang mahin i ki thu tuak kul hi. Kawlten paunakin *( ႏြားကြဲ က်ားကုိက္ ) ci hi. A kikhenthaang bawng hon te pen sahang in netum gai lel di hi. Gamvai le minam vai ong khen siam unla, "ZOMI" minam mah ci-in na kiko un. Na lungsim tawh a kituaklo aom aa leh lungduai takin i khua tangthu na kantel in. Zomi i hih lam kithei di hi.

Lungdam :)
♪♫Kimpu.