Silh Puan Siabang Khek Theihlohte

A zenzenin, ni khat ni-in; leitung mimbang na piankhiatna mi nih in ong nusia kha leh...., leitungah nang tawh sisan kinaipen mihing nih aom nawnlo di-in kingaihsun inla, na nu le na pa a nuntak lai-in limtak hopih in. Na adi-in nu le pa lungkham sinkham sak ngei kei in. Nu le pa lunggulh in; tate kiang pan sum le paaite sangin itna amau tawh omkhop pihna ahi zaw hi. Banghang hiam cih leh nu le pa adi'n tate pen a lungtang uh ahi hi.
------------------------------------------------------------------------

A zenzenin ni khat ni-in; leitung mimbang na piankhiatna mi nih in ong nusia kha leh....,leitungah na nuntak sung nang tungah itna, deihsakna leh thukhualna ong nei di mi nih a sumh di-in kingaihsun in. Nu le pa a kici kuamah peuh in, a han mai-ah naubang kahkah di lunggulh tuan hetlo di uh hi. Tuaih man, hun na ngah nakleh innah ciah in. Na inn ahilo gamdang mundang tuamtuam (Club) sung khawng ah na hun na beisak sangin na nu le pa' anglum sungah na hun zatnuam di gel zaw in. Banghang hiam cih leh, nu le pa te in tate ong ciah kik kal di kong gal gual na dondon den uh hi.
-------------------------------------------------------------------------
 A zenzenin ni khat ni-in; leitung mimbang na piankhiatna mi nih in ong nusia kha leh...., an na duhloh hun ciang, "an ne in" ci aa ong sawl di mi nih a nei nawnlo na hih lam kiphawk in. Tuaih man bangzah ta'n a pua lam ah nasep tawh na buai sawmvei zongin inn mah zuan inla, nu le pa tawh ankuang umkhawm hamtang sawm in. Banghang hiam cih leh nu le pa'n ong nusia khin leh amau tawh an nekkhop hun kingah nawnlo di hi.
--------------------------------------------------------------------------
 A zenzenin ni khat ni-in; leitung mimbang na piankhiatna mi nih in ong nusia kha leh...., Nang tungah "Damdam buang maw...? Nasep na senpy na...? Na gawng na? Na thau na? ci-in ong awlmawh tawntung dotna ong dongh den di mi nih na nei nawn kei ta hi. A taktakin ci leng mikhat i don i buaipih i awlmawhna cih nasep pen nasep lian mahmah khat ahi banleh, zong hamsa mahmah khat ahi hi. A tamzaw kua mah in a tawntungin nang ong don ong buaipih zo hetlo di hi. Tuaih ahih man nu le pa a damloh hun ciang limtak kem inla, khoi in. A lamna pi ah na om leh zong nu le pa phone set zel inla, nang ii omdan na gen mah bangin nu le pa ii cidamna khuatuah zel in. Bang hanghiam cih leh adam loh hun ciangun a lunggulh pen un, na hehpihna leh itna ahi hi.
--------------------------------------------------------------------------
A zenzenin ni khat ni-in; leitung mimbang na piankhiatna mi nih in ong nusia kha leh...., hih leitungah mong neilo tehpih omlo itna tawh ong it di mi nih a omnawn hetlo di'n kitel in. Tuaih man nu le pa lungsim nat di peuhmahin gamta ngei kei in. Nu le pa om lai in, a lungnop nadi bekbek hanciam in. Hun ngah vitlo, buai cih tak buai ing, cih khawngin phun sedah in. Na hun neihsun midangte tungah mawk bei sak kei in. Nu le pa lungtang sungah nang bek na om lam kiphawk den in. Lawm na tan leh adang kizong kik thei hi. Nasep na neih kei leh athak kizong kik thei hi. Na lungtang kitamzan zah dongin ngaih tawh na kikhen pial zong adang khat tawh kibelh thei buang hi. "Silh puansia zong gual phim kawm leng, kikhui thei lai ee.... " Ahiang, nu le pa nei nawn kei leng bangmah bangmah tawh kibehlap thei nawnlo hi, cih ong phawksak kik nuam ing.

* Hih lai ka at kawmin ka khitui ong luang hi. Lai kong at ciangin pawl khat ten kipilsak vai/ amah zong a tuci bek tam cih dotna ong nei nuam om kha di hi. A taktakin bel kei zong ka omna khual lamna pan hi aa, nu le pa kiang ka ngai mahmah hi. Ki theihsak man kitai nop mah hilo zawin kei ngaihsut bang no zong na na ngaihsut khak pih di ka lunggulh man hizaw hi. 

Nu le pa a lungkim sak leh a it zo den di'n ih biak Pasian in thupha ong piakim ciat tahen..!

Lailo iNFo.