Na Simsak Hamtang Dih Ve...

1)   Na lungkham thaneem hun tak ciang, tumging    
      (Music) tawh na palsak zawh di    ciam in..!  

2)   Ni khat sung ahoih pen aa i neih theih nadi-in, i  
      lungsim ahi thei zahin ih siantho sak di thupi  
      mahmah hi.

3)   "Launa" hangin "haina" suak thei bek thamloin, 
      "haina" hangin zong "launa" piang thei hi.

4)   Vasate a kha uh a po kiim ciang leeng thei 
      mah naven; kha kiim na tawh a leeng thei 
      hituanlo aa, kisinna in thupi mahmah hi.

5)   Na nuntak sungin neih le lamh vang gina na nei zo 
      kei zong, deihsakna leh itna vang na neih zawh di 
      hanciam hamtang in.

6)   Nisim limlangh(Maan) ah ki etin i hoihlohna i pumpi 
      tung aa a kisamh te i puahpuah hangh aa; 
      a sunglam ahi i lungsim sung ahoih di aa i puahdi   
      ki mangngilh kha thei zel hi.

7)  Mi nih; a laibu sim uh a kibat hangin, a pilna lak  
     dan uh ki lamdang hi.

8)  Laibu namkim a simte in laibu sung aa thu le late 
     avekpin a zui zo kei phial uh zong, vai thupi aom 
     ciang khetsatna hoih kician takin nei zo uh hi.

9)  Pilna piak dan nam khat om hi: - Mi dang khat ahoih 
     zia di lamlakin hawm hi. ----A sawtloin tuh mipa/nu 
     ong khangtoin hong gualzo takpi mah tase leh,pilna 
     a hawm khia mi pen kahlei thuap khat zong kahto  
     zo nailo hi.

10)  Gamtat hoihlo nam khat om hi: - Mi khat ii 
       khialhtna bekbek ngak gige aa omna ahi hi. 
      Gamtat hoihlo nam khat om hi. Mi' khialhna peuh  
       gensia nilohin ei khialhnate i ki puah phat 
       zawhlohna ahi hi.

11)  Mi khat na mawhsak di pen ama' khialhna taktak 
       himaw hilo cih kan phot di kisamh hi...Khat veivei  
       ciangin nang zong tuh dan khialhna khat peuh 
       pellointuak kha thei hamtang di hiteh.

12)  Nang sep bekbek thupi sak tuan se ken la; ama  
      sep  hun zong nasep khat mahin muh sak den in.

13)  Mi hoihlohna teng gensia se dah inla, nang le nang zong ahoihin na gamta zokhin hiam..?

14)  Na khialhna hangin manpha na sak mahmah khat 
       sup lawh hiteh. Bang hangin sup lawh ka hiam, cih 
       zong in! Na khialhna omlo pi-in na it mahmah na 
       manphat sak mahmah sup lawh/ tan lawh ngeilo 
       di hiteh.

15)  Na khialna hangin pilna ngah bawl inla, mailam na 
       kalsuan nadi lampi ah hih bang khialhna nihvei  
       tung sak ngei kei in!

16) Mi ong thu gen khat a man dong ngak bawl inla, tu 
      khitteh nial di aom leh zong nial suk pah lel in! A 
      nialhuai kei leh lah na cil lumsa tawh valh suk lel  
      in! Kem cip kei zaw in! Sawt leh mei-am neu kha  
      khat in meimual bangin puakkhamh thei hi.

17)  Na khan sungin mite ii nasepna khat peuhpeuh 
       ahoih lam lungsim tawh na et theih di hanciam 
       den hamtang in!

18)  Mi dang khat tawh na lungkham sinkham uh a 
       kibat laitak nang lungkhamna teng mangngilh  
       bawl inla, amah hehnem zaw in. Na lungkham lam 
       amah thei sak ke'n la, amah tha napiak kawmin 
       nang zong hehnepna tha na ngah kik zo di hi.

19)  Na lungsim sungah tui bangzah ta-in puang mah 
       tase leh, mite tui siang mah piak zawh di hanciam 
       in. ( Na lungsim bangzah ta'n kham mah tase leh, 
       mite lungdam nadi vaihawm pi inla, pawlbawl pih 
       zo det sawm in.)

20)  Na nuih laitak na nuihna in nuntakna nei zo tahen. 
      Nui khemin nuih di cileh na nuih sangin puam 
      ngeungau lel lecin hoihzaw lai di hi. Nui khem na in 
      mihing mel siasak hi.

21)  Tha napiak den na hanthoh den mi khat koimun 
       koimun a tung zongin a lungsim sungah nang ong 
       phawk masa den hi.