Myanmar Census & Code - 914 (Zomi)
Kawlgam Census leh 914 ~ Zomi cih tawh kisai in ka telcian nuam mahmah aa ka kankan leh U Kamno (JK Kam ) ii lai-at ka muh ciang nuam mahmah in kong hawmsawn pah hi.
THEIH HUAI:
1. Zomi ih kicihna in Chin or adang a kicite tawh ki langneihna ding hilo a, ei hihna (identity) pulakna ahi hi.
2. Mun leh pau awsuah zui in hong khenna ”pauke-namke”: Teizang, Dim, Saizang, Zo, Sihzang, Khuano, Guite,..etc, cihteng ih kigawm ciang Zomi a kicite ih hi hi.
3. Ei pauke-namke ciat tek tawh Census ah mimal 55,000 phazo hetlo ding ihih manin Zomi ah kigawm le hang ZOMI minam lian minam kip kisuak thei bek ding hi.
4. Code 401 na a “Chin" pen minam min hilo a, Chin State bup ading area code ahi hi. Gtn: Kachin 101, Kaya 201, Kayin 301, Chin 401, Myanmar 501, Mon 601, Rakhine 701, Shan 801. Gamdangmi 901.
5. 914 (Other) a khiatna pen, “A tunga minam min 913 te lakah kei minam min omlo aih manin ka minam min “ZOMI” cih 914 ah a gelh hi ing”, cihna hi a, ei gelh bangbang a hong ki ciamteh sak pah ding pen international law ahi hi.
6. Code 402-453 kikal ah namke-pauke min bek omin, ih minam bup ahuam min omlo ahih manin 914 ah ZOMI aci mi 55,000 a phak ding a kisam photphot ih hi hi.
7. Namke-pauke khattek tawh Census ah gelh kha hilehang, Zomi ah ih kipumkhat theihna ding lampi a om nawnlo suak ding hi.
8. Zomi ih suak khit hangin ih pauke-namke te a bei thei ding hi tuanlo hi.
9. ZCD pen Zomi sunga political party khat hi beka, Zomi kicih manin ZCD party member ki hipah lo hi.
HANTHOTNA:

1. “Zomi ka hi hi” ih cih hangin Kawlgam kumpi ii official record ah ”Zomi” cih om nailo ahih manin Zomi cih minam khatin hong kiciamtehna ding ii a kal masa in hih CENSUS ahi hi.
2. Chin sungah ei Zomi dan mah in pauke-namke tawh kikhensuk zihziah a, ei a ”Zomi” a ih kigawm theih bangin a kigawm theih kei vua leh Chin State sungah Zomi pen minam akician pen hong suak pah ding hi.
3. Zomi, Zotung, Zophei, Mizo..etc, cih dan in “Zo” min a pua Chin State sungah ahoih khop mah ki om ahih manin, hih census in Zomi teng kigawmkhop kikna ding a bulpi hong suak thei ding hi.
4. Zomi a kici teng pumkhatin ding thei lehang Chin State sungah minam dang ei zah a pha ding omlo hi. Gtn: Lai, Asho, Mara, Khomi, Dai, etc…